بنعبد العالي، خاص ب”ماذاجرى”،

واش عرفتي، آسي بنكيران، لا ش هوما باغين ادريس لشكر يدخل عندك؟.،راه غير باش يزاحمك “بكرشو ولسانو” ويقلب عليك الطاولة وقت ما بغا…اسمح لي عافاك راه باغين لحبيب المالكي يكون رئيس في مجلس النواب…

واش تعقل آسي بنكيران على مسلسل الأطفال اللي كان في بدايات الثمانينات “عمي ادريس..صديق انيس”،شوف تصويرتو لفوق باش تفكرو، كان عمرك ديك الساعة 26 عام فقط، يعني كنتي كتشوفو بلا شك،،ديك ساعة كان الاتحاد الاشتراكي كيقودو عبد الرحيم بوعبيد قبل ما يجي طبعا عبد الرحمان اليوسفي ويدخل بناتهوم محمد اليازغي، ديك الساعة كان حزب آخر، كانوا الناس كيقولو لنوبير الاموي “راه سبع بجلابة في ذيك الغابة” ما عمرهوم كانو كا يتصاورو هاذ الحزب غا يولي أليف وأنيس وغا يقودو “عمي ادريس ..صديق أنيس”.

إوا هذا عمي ادريس وعرفنا علاش بغاو يجيبوه، وسي ساجد؟ ديال الاتحاد الدستوري،،هههههه،،اللي ساجد راه ما كيشوف والو، مازال اللي راكع ساهل يهز راسو…

آودي الله يهديك آسي بنكيران، حنا قلنا سي محمد ساجد ..وهاذيك راها سميتو ما شي حالتو..والاسم لا يعني بالضرورة أن صاحبه ساجد او راكع او خانع او قل ما شئت…

واش عرفتي آسي عبد الأله ،علاش باغين ساجد وحزبو يدخلوهم  معاك؟ باش يسرطهوم بجوج حزب التجمع الوطني للاحرار، ويضمهوم لعندو، ويصبحو بجوج حزب واحد،..

راه دوك هاذوك الدستوريين ما كا يشبعوش من النعاس، ولكبار ديالهم الله يرحمهم ماتو، ما يدوم غير وجه الله”الله حي، ديما حي”..

واهز راسك آبوعبيد!!ماشي بوعبيد الشرقي اللي في بوجعد، كنقصد المعطي بوعبيد الله يرحمو، اللي كان شي يامات كيقود الاتحاد الدستوري،،،،واللي سماه اتحاد نسبة للاتحاد الاشتراكي،،،إوا ..هاليام جمعاتهوم بين يدين عزيز أخنوش؟ ومالو أخنوش يالله؟

واش عرفتي، آسي بنكيران،علاش بغاو يدكدوك مزيان؟ وتولي بزز منك أقلية ضعيفة في الحكومة؟..باش فين ما تحركتي بشي مشروع اجتماعي او اقتصادي أو سياسي تجيب بيه الشعبية، يديرو ليك العكاز قدام رجليك، ويعلموك تفكر مزيان قبل ماتزعم، ويقدر يلاهيوك بالشعيبية عوض الشعبية..

طبعا، انت عايق وعارف كلشي هاذ شي، ذاك شي باش عصيتي شوية، باش تبين للناس اللي صوتو عليك باللي راك ضحية، وتزيد متعاطفين آخرين…

راك كتقول في خاطرك ابنكيران:هاذ الناس مفروشين، هاذ الناس ما كيعرفوش يلعبو كبير، هاذ الناس دايرين رجل في الدستور، والرجل الأخرى تحت السرير، هاذ الناس ماهوما عفاريت، ما هو ما تماسيح، هاذ الناس مكلخين، كايزيدوني شعبية، وكيجعلوني ضحية، وكيفرشو روسهم امام الشعب..

لمخازنية آسي بنكيران ما عندهوم ما يديرو بالخطط والتاكتيكات والاستراتيجيات ذات المدى البعيد او المتوسط،،،لمخازنية كيعرفو غير كلمة “اجمع”، اجمع يعني اجمع!!!وخاصة مللي يهجمو على الفراشة..راه كنقول الفراشة ما شي الفراشة؟؟؟يعني دوك اللي كايبيعو في الزناقي والشوارع وكيفرشو الارض، ما شي دوك اللي كيفرشو الهضرة والكلام ولخبار..

آسي بنكيران، انت عارف باللي راه حتى واحد ما يقدر يزعم يصوت إذا عاودنا الانتخابات، وراه حتى واحد ما غا يحمل او يقبل هاذ الاحزاب المسيرة “بفتح الياء”، وراه حتى واحد ما غا يقبل الحزب المنافس اللي نفخو فيه بزاف بحال النفاخ وجابهوم حتى ل7 اكتوبر عاد تفركع.

إذن..آش المعمول آسي بنكيران..باش نحيدوك من قدامنا ..قولي آش المعمول….

والله حتى نقولها واللي بغا يكون يكون ..إوا تسناني  في الحلقة القادمة …غير غدا وغا نقوليك أشكان خصهوم يديرو…باش تمشي فحالك …