بنعبد العالي، ل”ماذا جرى” حصريا:

انا عارفك اسي بنكيران عايق وفايق، وعارفك “فران وقاد بحومة”، وعارفك كتدير براسك ما فاهم والو…

عارفك اسي بنكيران كتشد معاهم الزيار، كتكرف شوية معاهم لحبل حتى يعيق الشعب كامل، ويفهم اشنو واقع، عاد كترخف شوية، وكتتلق الامور…

انت اسي بنكيران كنت عارف من قبل بللي ما غا يتلقوكش للعب، والموقع ديال”ماذاجرى”خبرك في يوليوز 2016 يعني قبل الانتخابات ب3 اشهر، باللي “والله وخا تجي الاول في الانتخابات يا ما يخليوك تصاوب الحكومة”..واش عقلتي او لا؟في يوليوز آسي بنكيران…

واليوم هاهو ما داو معاك وجابو، حتى تخليتي على شباط ….عفوا …على حزب الاستقلال حيث المقصود ماشي شباط…وهاذوك الاستقلاليين خصهوم يبدلو سميات والوجوه..

ومللي طلع شباط مطور..وقالهوم غا نساند العدالة والتنمية، وخا مندخلش للحكومة،،غا يقلبوه بحال الضحك، في مؤتمر شهر مارس او قبل منو، ويقولو لغلاب او عبد الواحد الفاسي او حجيرة او الدويري:”قلب الطرح”، …واش كتعرف اشناهي “قلب الطرح” اعبد الإله؟والله حتى غا ينكرك حزب الاستقلال غدا، يعني من بعد شهر مارس،،، ومللي تقولهوم:راه انا هو بنكيران، غا يجاوبوك الاستقلاليون الجدد:عطينا عافاك “لاكارط ناسيونال”، وقول لينا آش باغي!!!

راهم رتبو لهاذ شي شحال هذا، وراك شفتي المدارس اللي تغلقات ديال “غولن”يعني ديال “محمد الفاتح”..راه ما تغلقات حتى لدابا ..يعني حتى “تبين الخيط الابيض من الخيط الاسود””..طبعا اسي بنكيران غا يقوليك الرئيس ديال الاتراك “أردوغان” حتى هو، وخا عزيز عليك وانت عزيز عليه  :اشكون انت؟وعطيني لاكارط ناسيونال..ومللي يعرفك أسي عبد الإله، والله حتى ينكرك، ويقول ليك”طلق مني عافاك،.راه ما بغيت صداع..وراه المغرب تعاون معايا في قضية غولن وجماعته، هاذوك اللي كانوا غا يهزو ليا رجليا…

آذي ؤنكءران!!! راه تعتاقلوا ليك شي وليدات من الشبيبة ديالك ياك؟.. إوا هاذيك علامة ديال اللي بغا يجبد الصداع، شوف آش غا يوقع ليه؟؟أكيد راك عقتي، ذاك شي واش كتسميهم:”صوكع”…خلاها كبور راجل الشعيبية:”ما كاينش معامن؟؟؟”..

إوا، وذاك الحزب الشيوعي التقدمي اللي كيموت فيك مولاه..سي نبيل بنعبدالله؟؟واش زعما بغيتي تفلت بيه فابور ..وخا ما جاب والو في البرلمان؟؟وا عشق كبير هذا..زعما تتغزل انت وياه كيف ما بغيتو تحت عينين المخازنية،،، وقلة لحيا هاذي،،

والله ما يخليو هاذاك “الزواج العرفي” يكمل بخير…

وهاني غدا غا نجبد ليك لوريقات لاخراين، تسناني آسي عبد الإله، نوريك غدا أشنو تدير، والله حتى نوريك لاين تهرب إلى بغيتي، وكيف تضرب إلى بغيتي، إوا تسناني غدا مع 11 ديال الصباح..غا نجاوبك على أسئلة خطيرة..ها علاش بغاو ادريس لشكر؟ وها علاش بغاو محمد ساجد؟؟وها علاش ترامب غا يشارك في اللعبة؟ وها كيفاش غا نتلهاو مع كأس إفريقيا؟ وها علاش نتسناو نتائج الانتخابات الفرنسية؟، وها علاش خصنا نجريو على شباط من حزب الاستقلال…ومللي نتفكروك غا نجيو نسولو فيك،،يمكن في مارس ويمكن في ابريل..